Япониялик олимлар муҳим кашфиётга эришишди: С витамини нафақат антиоксидант хоссалари ва коллаген синтези орқали танилган, балки у тери ҳужайраларининг янгиланиш жараёнларини генлар даражасида фаоллаштирар экан. Бу кашфиёт терининг ёшга боғлиқ ўзгаришларини даволашнинг янги усулларига йўл очиши мумкин.
Journal of Investigative Dermatology журналида чоп этилган тадқиқот натижасига кўра, L-аскорбин кислотаси (С витаминининг биологик фаол шакли) кератиноцит деб аталувчи тери ҳужайралари ўсишини эпигенетик механизмлар орқали рағбатлантиради. Инсон эпидермисининг уч ўлчовли моделларида ўтказилган тажрибалар шунга олиб келдики, С витамини қўшилганда тери қатлами анча қалинлашгани кузатилди.
🔬 Бу қандай ишлайди?
Молекуляр таҳлиллар шуни кўрсатдики, С витамини TET ферментини фаоллаштиради, бу эса ДНК деметилланиш жараёнини бошлайди. Натижада ROS1 ва RUNX2 каби ҳужайра кўпайишига жавоб берувчи генлар фаоллашади. Бу жараённинг муҳим кўрсаткичи сифатида 5-гидроксиметилцитозин миқдорининг ошиши қайд этилди — бу эса эпигенетик фаолият кучайганидан далолат беради.
Қизиқ томони шундаки, бу таъсир фақат L-аскорбин кислотаси иштирокида кузатилган. Витамин Снинг бошқа шакллари ёки синтетик аналоглари бундай самара бермаган.
🧬 Бу тиббиёт ва косметология учун нимани англатади?
Олимларнинг фикрича, ушбу натижалар кексаликда терининг ингичкалашишига қарши курашиш ва унинг қайта тикланишини тезлаштириш учун янги усуллар ишлаб чиқишда асос бўлиши мумкин. Бироқ бу таъсирни амалиётда қўллаш учун инсонлар устидан қўшимча клиник синовлар ўтказилиши керак.
📌 Айтганча, С витаминигина эмас — D витамини ҳам кутилмаган хоссаларга эга эканлиги аниқланган. Илмий маълумотларга кўра, у хромосомаларнинг учларидаги ҳимоявий қисмлар — теломерлар қисқаришининг олдини олиб, биологик қариш жараёнини секинлаштириши мумкин.
✨ Хулоса: С витамини — шунчаки антиоксидант эмас, балки генлар даражасида тери янгиланишини фаоллаштирувчи восита. Эпигенетикага асосланган тери парваришида янги давр айнан у орқали бошланиши мумкин.
