Чирчиқ шаҳрида Россиянинг «Аудиотеле» аутсорсинг контакт-марказининг янги филиали ўз фаолиятини бошлади. Расмий очилиш маросими 7 май куни бўлиб ўтди. Унда шаҳар ҳокими Муроджон Абдураҳимов, Тошкент вилояти IT Park филиали ва компания раҳбарлари иштирок этди.
Бу Чирчиқ учун нима маъно англатади?
Колл-марказнинг очилиши нафақат шаҳарнинг рақамли инфратузилмасини ривожлантиришга, балки 150 дан ортиқ янги иш ўринлари яратилишига хизмат қилади. Бу иш ўринлари, аввало, аутсорсинг ва мижозларга хизмат кўрсатиш соҳасида карьера бошлашни хоҳловчи ёшлар учун мўлжалланган. Шу билан бирга, бу Чирчиқ рақамли хизматлар ва IT сармоялар учун жозибадор ҳудудга айланаётганидан дарак беради.
«Аудиотеле» ким?
«Аудиотеле» — 1997 йилдан буён колл-марказлар соҳасида фаолият юритиб келаётган россиялик компания. Ўзбекистонда унинг манфаатларини Voice Solutions VB номли шўъба корхонаси ифода этади. Бу компания 2022 йил апрель ойида ташкил этилган бўлиб, 500 миллион сўм устав капиталига эга. Компания тўлиқ россиялик муассисга тегишли. Филиалга Дмитрий Фалалеев раҳбарлик қилади.
Чирчиқ — рақамли ривожланиш марказида
Филиал IT Park доирасида очилган бўлиб, мазкур ташкилот мамлакатнинг рақамли трансформациясини қўллаб-қувватлашда фаол иштирок этмоқда. IT Park маълумотларига кўра, жорий йилнинг дастлабки икки ярим ойида 104 та экспортга йўналтирилган компания резидент мақомини олган. Улардан 40 таси бизнес-аутсорсинг ва корпоратив хизматлар билан шуғулланади.
Чирчиқдаги «Аудиотеле» филиалининг очилиши — бу шаҳарда замонавий рақамли ва бизнес кластерни яратиш йўлидаги навбатдаги қадам. Бу орқали янги иш ўринлари, малакали кадрлар ривожи ва халқаро бозорга чиқиш имкониятлари кенгаяди.
