Президентнинг 2025 йил 3 ноябрдаги ПҚ–327-сонли қарори билан “Ўзбекистон Республикаси фуқароларининг ҳарбий хизматни ўташ тартиби тўғрисида”ги низомга (lex.uz) ўзгартириш ва қўшимчалар киритилди.
Қарорга мувофиқ, Чирчиқ олий танк командир-муҳандислик билим юрти битирувчилари, шунингдек бошқа олий ҳарбий таълим муассасалари битирувчилари ўқишни тугатгандан сўнг 5 календарь йил офицер лавозимларида хизматни ўташлари шарт бўлади.
Агар битирувчи белгиланган муддатда хизматни ўтамаса, унинг таълими учун сарфланган маблағлар давлат бюджетига қайтарилади.
Амалдаги қонунчиликка кўра, ҳарбий таълим муассасаларини тамомлаган фуқаролар 5 йил мобайнида офицерлар таркиби лавозимларида хизмат қилишлари ёки хизматни ўтамасалар, уларни ўқитиш учун сарфланган маблағларни давлат бюджетига қайтаришлари кераклиги белгилаб қўйилган эди.
Бироқ сўнгги йилларда ҳарбий таълим муассасаларини битирган баъзи ёш мутахассислар нафақат Қуролли Кучлар тизимида, балки бошқа вазирлик ва идораларда ходим сифатида ишлаб келган. Шу боис ушбу ҳолатни ҳуқуқий жиҳатдан аниқ белгилаш зарурати юзага келди.
Эндиликда янги қарорга кўра, агар битирувчи ҳарбий хизматчи эмас, балки ходим сифатида бошқа давлат тузилмаларига ишга юборилган бўлса ҳам, у 5 календарь йил давомида хизматни ўташи шарт.
Шу тариқа, ёш офицер кадрлар тайёрлаш учун сарфланган маблағларни ундириш тизими такомиллаштирилди ва битирувчиларнинг хизмат мажбурияти ҳуқуқий жиҳатдан мустаҳкамланди.
📍 Чирчиқ олий танк командир-муҳандислик билим юрти — Ўзбекистондаги етакчи ҳарбий таълим муассасаларидан бири бўлиб, у ерда Қуролли Кучлар, танкчилик ва муҳандислик бўлинмалари учун офицер кадрлар тайёрланади.
