Дайди итлар муаммоси ҳудудимиздаги энг ташвишли масалалардан бири бўлиб қолмоқда. Биз Чирчикдаги вазият ҳақида бир неча бор ёзганмиз — шаҳарда кўплаб аҳоли дайди итлардан жабр кўрган, тишлаш ҳолатлари эса тез-тез учраб туради. Афсуски, бу муаммо ҳалигача жиддий хавотир уйғотмоқда.
Бу сафар фожиали хабар қўшни Ангрен шаҳридан келди.
ОАВ маълумотларига кўра, ўтган ҳафта Тошкент вилоятининг Ангрен шаҳридаги «Истиклол» маҳалласида 8 ёшли Имронбек исмли бола дайди ит ҳужуми оқибатида ҳалок бўлган. Маълум қилинишича, у мактабдан қайтиб келаётганда йўлни қисқартириш учун бўш ер орқали ўтмоқчи бўлган. Ўша куни кучли ёмғир ёғаётгани сабабли бу ерда одамлар деярли бўлмаган.
Ўқитувчилари уни фаол ва жуда яхши ўқувчи сифатида эслашмоқда. Одатда уни дарсдан кейин акаси олиб кетар эди, аммо маҳалла аҳолисининг айтишича, ўша куни у акаси билан ажралиб, қисқароқ йўлдан кетган бўлиши мумкин.
Маҳалла аҳолиси бу ҳудудда дайди итлар муаммоси анча вақтдан бери мавжудлигини ва бу ҳақда бир неча бор шикоят қилинганини айтишмоқда.
Фожиадан кейин маҳаллада шаҳар ҳокими ва ҳуқуқни муҳофаза қилувчи органлар иштирокида учрашув ўтказилди. Тошкент вилояти ҳокимияти ҳодиса юзасидан текширув олиб борилаётганини маълум қилди. Шаҳарда дайди ҳайвонларни назорат қилиш, уларни тутиш ва махсус жойларда сақлаш бўйича ишлар кучайтирилган. Боладан гумон қилинган ит ҳам ушлангани айтилмоқда.
Афсуски, содир бўлган воқеани энди ортга қайтариб бўлмайди. Аммо бу фожиа яна бир бор дайди ҳайвонлар муаммоси қанчалик жиддий эканини кўрсатди.
Чирчик аҳолиси эса шаҳар ҳокимияти бундай фожиалар бизнинг шаҳримизда ҳеч қачон такрорланмаслиги учун барча зарур чораларни кўради, деган умидда.
