Яқин кунларда Чирчиқда янги ўқув йили бошланади. Ота-оналар болалари билан бирга мактабга тайёргарлик кўришмоқда. Шулардан бири — мактаб рюкзаги ва зарурий жиҳозларни танлаш. Аммо шуни унутмаслик керакки: ортиқча оғирликдаги сумка соғлиққа жиддий зарар етказиши мумкин.
Нега бу муҳим?
Жуда оғир рюкзак боланинг бел ва бўйни оғришига, тез чарчашига олиб келади. Бундан ташқари, умуртқа суягида салбий ўзгаришларга сабаб бўлиши мумкин. Бу айниқса бошланғич синф ўқувчилари учун хавфли, чунки уларнинг организми ҳали жуда ҳассос.
Мутасаддилар нима дейди?
Тошкент шаҳар Санэпидкомитети маълумотларига кўра, мактаб рюкзакларининг оғирлиги кўпинча белгиланган меъёрдан икки-уч баробар кўп бўлади. Масалан, рюкзакнинг ўзи 1–1,5 кг атрофида. Агар унга бир нечта дарслик, дафтарлар, кундалик, канцтоварлар, спорт формаси ва овқат қўшилса — юк ҳаддан ташқари оғир бўлиб қолади.
1–2-синф ўқувчилари учун рюкзакнинг умумий оғирлиги 1,5 кг дан ошмаслиги лозим. Шунинг учун ота-оналар бола ҳар куни мактабга олиб кетаётган буюмларга жиддий эътибор қаратишлари керак.
Ота-оналарга маслаҳатлар
- Ортопедик спинкаси ва кенг ёқа тасмалари бўлган рюкзакни танланг.
- Сумканинг ичида керак бўлмаган буюмлар йўқлигини мунтазам текширинг.
- Болангизга ортиқча нарсаларни уйда қолдириш кераклигини тушунтиринг.
Ўқиш болаларимизга қувонч олиб келиши, соғлиғига эса зарар етказмаслиги керак. Болаларимизни асраб, уларнинг мактабга йўли енгил ва хавфсиз бўлиши учун биргаликда ҳаракат қилайлик.
