Ўзбекистонда пенсионерлар учун янги давлат онлайн-хизмати жорий этилди. Энди пенсия тўловларини банк картасидан нақд шаклга ўтказиш уйдан чиқмаган ҳолда, бир неча дақиқада амалга оширилиши мумкин.
Расмий маълумотларга кўра, мамлакатда 4,2 миллионга яқин пенсионер мавжуд бўлиб, уларнинг тахминан 3,8 миллиони пенсияни пластик карта орқали олади, қолган қисми эса нақд пулда. Чирчиқ шаҳрида ҳам ушбу нисбат деярли шу тарзда.
Нега бу хизмат муҳим?
Сўнгги йилларда пенсия тўловларининг безнал шаклга ўтказилишига қарамай, барча кексалар ҳам банк карталаридан фойдаланишга тайёр эмас. Пенсионерлар томонидан қуйидаги шикоятлар тез-тез учраб турган:
-
улар пенсия тўловлари огоҳлантирилмасдан безнал шаклга ўтказилгани;
-
фирибгарлардан қўрқиш;
-
картадаги маблағни ҳисоблашда қийналиш;
-
банкомат ва мобил иловалардан фойдаланишда муаммолар.
Янги хизмат айнан шу масалаларни ҳал этишга қаратилган бўлиб, пенсионерга ўзи учун қулай тўлов шаклини танлаш ҳуқуқини қайтаради.
Пенсияни нақд шаклга қандай ўтказиш мумкин?
Бунинг учун пенсионер:
-
Ягона интерактив давлат хизматлари порталида авторизациядан ўтади;
-
электрон аризада шахсий маълумотларни тўлдиради;
-
онлайн сўровни юбориши кифоя.
Эътиборли жиҳати:
-
қўшимча ҳужжатлар талаб этилмайди;
-
Пенсия жамғармаси бўлимларига шахсан бориш шарт эмас.
Барча жараён бир неча дақиқа ичида бажарилади.
Ҳозирда пенсиялар қандай тўланмоқда?
Амал қилаётган тартибга кўра:
-
банк карталарига пенсиялар ҳар ойнинг 5-кунига қадар ўтказилади;
-
нақд пенсиялар эса 4-кунидан 27-кунигача тасдиқланган жадвал асосида етказиб берилади.
Кексалар учун қулайлик ва ҳурмат сари қадам
Ушбу онлайн-хизматнинг ишга туширилиши — айниқса нақд пулга ўрганган ва анъанавий усулни афзал биладиган пенсионерлар учун муҳим янгилик. Чирчиқ ва бошқа шаҳарлардаги кўплаб кексалар учун бу қарор ҳаётни анча енгиллаштириши шубҳасиз.
