«Ўзбекнефтгаз» компанияси жорий йил сентябр ойидан бошлаб АИ-80 бензини ишлаб чиқарилишини тўхтатишини расман тасдиқлади. Бу ҳақда Kursiv Uzbekistan нашрига компания матбуот хизмати маълум қилди.
АИ-80 — октан сони 80 бўлган ёқилғи бўлиб, асосан эски русумдаги автомобиллар ва сиғими паст бўлган қишлоқ хўжалиги техникасида қўлланилади. Сўнгги йилларда бу турдаги бензиндан воз кечиш масаласи бир неча бор кўтарилган, аммо амалга ошириш муддатлари доимий равишда кейингига қолдирилган. Бу гал қарор қатъий қабул қилинганга ўхшайди.
Экология вазирининг маслаҳатчиси Расул Кўшербаевнинг таъкидлашича, 2026 йилдан бошлаб Ўзбекистонда фақат АИ-95 ва АИ-80 маркали бензинларни сотишга рухсат берилади. Бироқ, АИ-80 ишлаб чиқаришдан бутунлай олиб ташланади. Бу чора «Ўзбекистон-2030» стратегияси доирасида атроф-муҳитни муҳофаза қилишга қаратилган.
Президент ҳузуридаги Статистика агентлиги маълумотларига кўра, 2025 йил июнь ойи бошига келиб, Ўзбекистонда 488,2 минг тонна бензин ва 441,4 минг тонна дизель ёқилғиси ишлаб чиқарилган. Йиллик ишлаб чиқариш ҳажми юқори бўлишига қарамасдан, давлат экологик ва замонавий стандартларга мувофиқ ёқилғи турларига ўтишни мақсад қилган.
АИ-80дан воз кечиш мамлакат автопаркини янгилаш ва ҳавога чиқариладиган зарарли моддалар миқдорини камайтиришда муҳим қадам бўлиши мумкин. Экологлар ва жамоатчилик бу бензин тури атроф-муҳитга зарарли эканини кўп марта таъкидлаган. Энди умид қиламизки, бу қарор амалга ошади ва шаҳарларимиз ҳавоси бир оз бўлса ҳам тозаланади.
