Ўзбекистоннинг машҳур гимнасткаси Оксана Чусовитина Лос-Анжелесда бўладиган 2028 йилги Олимпия ўйинлари учун саралов босқичидан ўтишни мақсад қилганини билдирди. Унинг айтишича, ҳозир барча эътибори машғулотларга қаратилган.
«Ҳозир фақат машқ қилмоқчиман ва мусобақаларга чалғимоқчи эмасман. 2027–2028 йилларда Олимпия ўйинларига сараловдан ўтиш учун тинч шароитда тайёргарлик кўрмоқчиман», — дея келтиради ТАСС гимнастканинг сўзларини.
Чусовитина — 1992 йилги Олимпиаданинг жамоавий туридаги чемпиони ва рекорд даражада саккизта Олимпиада иштирокчиси. Жорий йилда эса, 50 ёшида, Тошкентдаги FIG турнирида кумуш медални қўлга киритди ва яна бир бор ёш — фақат рақам эканини исботлади.
🇺🇿 Биз Оксана билан фахрланамиз ва унинг Лос-Анжелес Марафони йўлида албатта қўллаб-қувватлаймиз!
