Токиода 15–26 ноябр кунлари бўлиб ўтаётган XXV Ёзги Сурдлимпия ўйинлари тадбирининг очилиш маросими бўлиб ўтди. Бу нуфузли мусобақалар карсонлик билан боғлиқ имконияти чекланган спортчилар учун халқаро майдон бўлиб, Халқаро Кар спорт қўмитаси (ICSD) томонидан ҳар тўрт йилда ўтказилади. Сурдлимпия ўйинлари қарийб юз йиллик тарихга эга бўлиб, энг қадимий параспорт мусобақаларидан бири ҳисобланади.
Ўзбекистон спортчилари жорий ўйинларда тўрт йўналиш бўйича иштирок этмоқда:
- футбол,
- дзюдо,
- стол тенниси,
- таэквондо.
Сурдлимпия ўйинлари дунёнинг ўнлаб мамлакатларини бирлаштириб, инклюзив спортни ривожлантириш ва эшитиш имконияти чекланган истеъдодли спортчиларни қўллаб-қувватлаш учун муҳим платформа бўлиб хизмат қилади. Ўзбекистон делегациясининг иштирок этиши мамлакатимиз спортчиларининг салоҳияти ва халқаро майдонда янги ютуқларга интилишини яна бир бор намоён этмоқда.
