Президент қарорига кўра, Ўзбекистонда Рамазон ойининг бошланиши 19 февралга тўғри келади. Бу ҳақда Ўзбекистон мусулмонлари идораси ахбороти асос қилиб олинган.
Жорий йилда ишлар «Рамазон — меҳр-мурувват, аҳиллик ва шукроналик ойи» ғояси асосида ташкил этилади.
Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари тегишли идоралар ва жамоат ташкилотлари билан ҳамкорликда Рамазон ойини миллий анъана ва қадриятларга мос равишда ўтказиш чораларини кўради.
Қарорга мувофиқ:
- кам таъминланган ва ижтимоий ҳимояга муҳтож фуқароларни ҳар томонлама қўллаб-қувватлаш;
- маҳаллаларда ўзаро ҳурмат ва ҳамжиҳатлик муҳитини мустаҳкамлаш;
- муқаддас қадамжолар, зиёратгоҳлар ва қабристонларни ободонлаштириш;
- Рамазон тадбирларини ихчам, мазмунли ва исрофгарчиликка йўл қўймасдан ташкил этиш назарда тутилган.
Чирчиқ шаҳрида ҳам Рамазон ойи муносабати билан хайрия тадбирлари, ободонлаштириш ишлари ва эҳтиёжманд оилаларни қўллаб-қувватлашга қаратилган акциялар ўтказилиши кутилмоқда.
Рамазон — бу руҳий покланиш, эзгу амаллар ва бирдамлик ойидир.
