3 май куни қисқа муддатли ёмғирдан сўнг Тошкент шаҳрида «Чорсу» метро бекати ва унга туташ ҳудудлар сув остида қолди. Сабаб оддий — ирригация ва дренаж тармоқларининг тўсилиб, цементлаб қўйилгани. Бу ҳақда пойтахт ҳокимлиги дренаж тизимлари бошқармаси муҳандиси Фарҳод Нажмиддинов маълум қилди. Ариклар ва каналлар қурилиш ишлари ҳамда автотураргоҳлар ташкил этиш жараёнида зарарланган. Бу эса яна бир бор «автомобиллар манфаати учун» қилинган қарорлар коммунал муаммолар ва катта йўқотишларга олиб келишини кўрсатди.
Чирчиқ шаҳрида ўша куни ёмғир бўлмади, аммо вазият кўп жиҳатдан ўхшаш. Шаҳар аста-секин инфратузилмавий барқарорлигини йўқотмоқда. Пиёдалар ҳудудига автомобиллар киришини чекловчи тўсиқлар олиб ташланмоқда — машиналар Навоий майдонига, дарё бўйига, ижтимоий объектлар ҳудудига бемалол кириб бормоқда. Кўп жойларда ер қоплами йўқ қилинмоқда: уй атрофи ҳудудлари бетон билан қопланяпти, биринчи қаватлар тижорат объектларига айлантирилиб, яшил ҳудудлар ўрнида кириш йўллари ва автотураргоҳлар барпо этилмоқда. Бу ҳолатни ҳозирнинг ўзидаёқ Навоий проспектида кўриш мумкин. Илгари бу кўча қандай кўринишда бўлганини ким эслайди? Фарқни ҳис қилинг! Энг хавфли ҳолат эса — арикларнинг йўқ қилиниши. Улар фақат панжара билан ёпилмаяпти, балки бутунлай тўлдирилиб, цементлаб ташланмоқда. Бунга мисол — собиқ «Мираж» кафеси атрофи.
Қонунчилик бундай ҳаракатлар учун жавобгарликни назарда тутади: ноқонуний бетонлаштириш ва яшил ҳудудларни йўқ қилиш учун катта миқдорда жарималар белгиланган. Аммо савол туғилади — бу нормалар амалда ишлаяптими?
Ёмғир пайтида оқибатлар аниқ кўринади. Шаҳар рельефи сабаб юқори қисмдан сув пастга оқиб тушади, аммо ёпилган ёки ифлосланган ариклар бу юкламани кўтара олмайди. Заковат, Гулистон, Абдулла Қодирий кўчалари мунтазам равишда «дарё»га айланади. Асосий юклама Навоий проспекти бўйлаб ўтувчи ариқларга тушади, аммо улар аралашувлардан кейин буни уддалай оладими?
Буни навбатдаги ёмғир билан текшириш — хавфли йўл. Бундан кўра ҳозирнинг ўзида профилактик чоралар кўриш лозим: дренаж тизимларини сақлаш, яшил ҳудудларни ҳимоя қилиш ва пиёдаларга устуворликни қайтариш. Фақат шунда Чирчиқ ҳақиқатан ҳам яшаш учун қулай ва хавфсиз шаҳарга айланади.
