Чирчиқ аҳолиси «Ўрмон» боғи рўпарасидаги катта ер майдони баланд девор билан ўраб олинганини пайқашган. Бизга ҳам, ўқувчиларимизга ҳам бу ерда нима бунёд этилиши қизиқ бўлди. Келинг, биргаликда билиб оламиз.
Қурилиш майдонидаги ахборот стендига кўра, бу ерда Чирчиқ шаҳридаги IT Park инкубация биноси қурилади. Лойиҳанинг буюртмачиси — IT Park Uzbekistan, пудратчиси эса «Shanghai Construction Group» МЧЖ деб кўрсатилган.
Лойиҳа замонавий тўрт қаватли бинoни назарда тутади. Бинонинг қурилиш майдони 1472 квадрат метр, умумий майдони эса 4000,63 квадрат метрни ташкил этади. Қурилиш учун ажратилган ҳудуд 16 147,14 квадрат метр.
Тасвирларда кенг иш жойлари, офислар, ўқув ва конференция хоналари кўзда тутилгани акс этган. Ҳудуднинг 66,5 фоизи яшил майдондан иборат бўлади. Шунингдек, 50 та автомобильга мўлжалланган автотураргоҳ ташкил этилади.
Похоже, в Чирчике появится ещё одна современная площадка для IT-специалистов, стартапов, обучения и новых проектов.
Демак, Чирчиқда IT-мутахассислар, стартаплар, таълим ва янги лойиҳалар учун яна бир замонавий маскан пайдо бўлиши кутилмоқда.
Маълумот учун:
«Shanghai Construction Group» МЧЖ — Хитойнинг йирик қурилиш ва инфратузилма компанияси ҳисобланган Shanghai Construction Group (SCG) билан боғлиқ пудратчи ташкилот. Гуруҳ 1953 йилда ташкил этилган бўлиб, бинолар, транспорт ва шаҳар инфратузилмаси объектларини қуриш, лойиҳалаш ҳамда девелопмент йўналишларида фаолият юритади. IT Park Uzbekistan расмий маълумотига кўра, SCG Ўзбекистон ҳудудларида замонавий IT Park мажмуаларини барпо этиш лойиҳаларида иштирок этмоқда.
IT Park Uzbekistan — мамлакатда IT соҳасини ривожлантириш, стартаплар ва технологик компанияларни қўллаб-қувватлаш, мутахассислар тайёрлаш ҳамда рақамли инфратузилмани яратишга хизмат қилувчи технологик майдон. IT Park Uzbekistan расмий сайти.
